លួចកម្មសិទ្ធិបញ្ញា ក៏នាំទុក្ខទោស ទាញទម្លាក់តម្លៃសង្គមដែរ

2018-05-25 08:52:43
ការអប់រំ

2018-05-25 08:52:43
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកស្រាវជ្រាវ និងសិក្សាពីប្រវត្តិសាស្ត្រខ្មែរ១រូប បានបង្ហាញពីការព្រួយបារម្ភ ចំពោះការកើនឡើងនៃ បញ្ហា១ ដែលកំពុងបន្តកើតមានក្នុងសង្គមខ្មែរបច្ចុប្បន្ន ដែលធ្វើឲ្យមានការមិនសប្បាយចិត្ត និងស្អប់គ្នា។ នោះគឺការលួចចម្លងកម្មសិទ្ធិបញ្ញា។

ក្នុងកិច្ចសម្ភាសផ្តាច់មុខ១ ជាមួយ Sabay លោក សំបូរ មាណ្ណារ៉ា ព្រឹទ្ធសកលវិទ្យាធិការរង នៃសកលវិទ្យាល័យបញ្ញាសាស្ត្រ កម្ពុជា បានមានប្រសាសន៍ថា ការលួចចម្លងកម្មសិទ្ធិបញ្ញា តាមពិតទៅ មិនមែនជារឿងថ្មី តែអ្វីដែលថ្មី ចម្លែកនោះ គឺកំណើននៃការលួចចម្លង កាត់ ត និងយកមកធ្វើជាកម្មសិទ្ធិខ្លួនឯង ដោយគ្មានការអនុញ្ញាតពីម្ចាស់ដើម។

លោក សំបូរ មាណ្ណារ៉ា

លោកសាស្ត្រាចារ្យ បានពន្យល់ថា មិនមែនជារឿងតូចតាចទេ តែការលួចចម្លងកម្មសិទ្ធិបញ្ញា ជារឿងខុសច្បាប់ នាំទុក្ខដល់អ្នកល្មើស និងទាញតម្លៃសង្គមធ្លាក់ទឹក នឹកស្មានមិនដល់។

ម្យ៉ាងអ្នកលួចចម្លងកម្មសិទ្ធិ គឺបានឆ្លុះបញ្ចាំង ពីអសមត្ថភាព នៃចំណេះដឹង និងភាពមិនចេះបង្កើតអ្វីថ្មី នៃបុគ្គល ដោយចាំតែលួចចម្លង លួចឆ្នៃរបស់ដែលមានស្រាប់ៗជាដើម។

បញ្ហានេះ សាស្ត្រាចារ្យខាងលើ បានប្រាប់ថា មាន២ឫសគល់ ទី១ គឺកម្សោយ នៃការអាន និងការខ្ជិលសិក្សាស្រាវជ្រាវធ្លាក់ចុះ។ លោកបន្តថា អំណាចនៃការអាន គឺមានឥទ្ធិពលដល់ការគិត ការស្ដាប់ ការកត់ចំណាំ មុនឈានដល់ការសរសេរអ្វី១បានល្អ។ សម័យនេះ លោកទទួលស្គាល់ថា មនុស្សជំនាន់ថ្មីភាគច្រើន ខ្ជិលអាន ដោយអាងលើ Google ឬគ្រឿងអេឡិចត្រូនិកទាំងស្រុង។

រូបតំណាង ការអាន និងរូបថតរក្សាសិទ្ធិដោយ Sabay

ចំណែកឯការខ្ជិលសិក្សាស្រាវជ្រាវវិញ លោក សំបូរ មាណ្ណារ៉ា ចង់សំដៅដល់ការ មិនបានចំណាយពេលធ្វើ ឬចងក្រងអ្វីថ្មីដោយខ្លួនឯង ពោលគឺចាំតែដល់ពេលត្រូវការ ទើបចាប់ផ្ដើមរុករកលួចគេនាយអាយ ឬយកពីអ៊ីនធឺណិត តែតាមពិតជាកម្មសិទ្ធិគេ រួចយកដូរតែបន្តិចបន្តួច ធ្វើជារបស់ឯង និងមិនដាក់ឈ្មោះឯកសារយោងម្ចាស់ដើម។

តាមគេហទំព័ររបស់ក្រសួងពាណិជ្ជកម្មកម្ពុជា កម្មសិទ្ធិបញ្ញា (IP) សំដៅទៅលើការបង្កើតដោយគំនិតបញ្ញា ដូចជា តក្កកម្ម ស្នាដៃអក្សរសាស្ត្រ និងសិល្បៈ និមិត្តសញ្ញា រូបភាព និង គំនូរ ដែលត្រូវបានប្រើប្រាស់ នៅក្នុងពាណិជ្ជកម្ម។

ច្បាប់កម្មសិទ្ធិបញ្ញា គឺជាច្បាប់រក្សាតម្លៃរបស់គំនិត ដែលបានអនុម័ត ស្ទើរតែទាំងអស់ដោយរាជរដ្ឋាភិបាល បានផ្ដល់ឲ្យអ្នកបង្កើតច្បាប់ដើម មានសិទ្ធិយ៉ាងពិសេសចំពោះវា ក៏ប៉ុន្តែវាមាន រយៈពេលកំណត់ណាមួយ។

ព័ត៌មានបន្ថែម ពីកម្មសិទ្ធិបញ្ញា សូមអានឯកសារដែលចុះផ្សាយនៅលើគេហទំព័ររបស់អង្គការកម្មសិទ្ធិបញ្ញាពិភពលោក (WIPO) ឬទាក់ទងទៅនាយកដ្ឋានកម្មសិទ្ធិបញ្ញា នៃក្រសួងពាណិជ្ជកម្មកម្ពុជា តាមទូរស័ព្ទ ០២៣ ៨៦៦ ១១៤/១១៥, ០១២ ៨២៦ ១៦៦ និង០១១ ៨៧៣ ១៩១ ឬ គេហទំព័រ: www.cambodiaip.gov.kh

អត្ថបទ៖ ពៅ រក្សា