- 2018-09-17 02:40:18
- សេដ្ឋកិច្ច
អ្នកជំនាញ បង្ហើបពីជំនាញទីផ្សារការងារកំពុងត្រូវការច្រើនតែនៅខ្វះកម្លាំងពលកម្ម
- 2018-09-17 02:40:18
- ចំនួនមតិ 0 | ចំនួនចែករំលែក 0
អ្នកជំនាញ បង្ហើបពីជំនាញទីផ្សារការងារកំពុងត្រូវការច្រើនតែនៅខ្វះកម្លាំងពលកម្ម
ចន្លោះមិនឃើញ
មន្ត្រីជំនាញធ្វើការលើវិស័យការងារឲ្យដឹងថាសព្វថ្ងៃជំនាញមួយចំនួនកំពុងមានតម្រូវការខ្លាំងនៅលើទីផ្សារ តែមិនទាន់មានធនធានមនុស្សគ្រប់គ្រាន់សម្រាប់បំពេញទៅតាមតម្រូវការនៅឡើយ។
ក្នុងបទសម្ភាសន៍ជាមួយ Sabay កាលពីសប្តាហ៍មុន ឯកឧត្តម ហៃ ហ៊ុនឡេង អនុប្រធានទីភ្នាក់ងារជាតិមុខរបរ និងការងារ នៃក្រសួងការងារ មានប្រសាសន៍ថាតាមទិន្ន័យដែលក្រុមការងារប្រមូលបានបង្ហាញថាចំនួនឱកាសការងារ មានច្រើនជាងអ្នកកំពុងស្វែងរកការងារធ្វើ។
មន្ត្រី៖ យុវជនត្រូវដុសខាត់សមត្ថភាពបន្ថែមទៀតដើម្បីងាយស្រួលរក និងរក្សាការងារ
ត្រង់ចំណុចនេះឯកឧត្តមពន្យល់ថាទីមួយឆ្លុះបញ្ចាំងថាចំនួនឱកាសការងារសម្បូរបែបធ្វើឲ្យអ្នករកការងារធ្វើមានជម្រើសច្រើន និងចំណុចមួយទៀតអាចឆ្លុះបញ្ចាំងបានថាអ្នកស្វែងរកការងារនៅមិនទាន់មានសមត្ថភាព និងគុណវុឌ្ឍគ្រប់គ្រាន់ដើម្បីស្រូបយកឱកាសការងារ។
ឯកឧត្តមផ្តល់ជាឧទាហរណ៍បញ្ជាក់ថាក្នុងកម្មវិធីសម្ភាសន៍ការងារ រៀបចំដោយទីភ្នាក់ងារជាតិមុខរបរ និងការងារនិងមានក្រុមហ៊ុនឯកជនចូលរួមជ្រើសរើសបុគ្គលិកប្រចាំខែនោះ បង្ហាញថាបេក្ខជនដែលបានដាក់ពាក្យចូលបម្រើការងារមានតែប្រមាណ៣០ភាគរយប៉ុណ្ណោះដែលបានទទួលការងារ។
ឯកឧត្តមបញ្ជាក់ថា៖ «ខ្ញុំអត់ចងនិយាយថាអ្នករកការងារធ្វើអត់សមត្ថភាពទេ ប៉ុន្តែសមត្ថភាពរបស់គាត់នោះមិនទាន់ជួបឬមិនទាន់ឆ្លើយតបពេញលេញអ្វីដែលឱកាសការងារផ្តល់ជូនឬទីផ្សារការងារចង់បាន អ៊ីចឹងហើយយើងប្រើភាសាមួយថាវាជាគម្លាតនៃជំនាញ ឬកង្វះខាតជំនាញដែលទីផ្សារចង់បាន»។
បើនិយាយដល់ចំណុចនេះវិញឯកឧត្តមឲ្យដឹងថាការសិក្សាលើជំនាញអ្វីក៏មានសារៈសំខាន់ដូចគ្នា គ្រាន់តែថាបើរើសរៀនជំនាញដែលត្រូវតាមតម្រូវការទីផ្សារដែលកំពុងសម្បូរបែបកាន់តែប្រសើរ។
បើតាមឯកឧត្តម ហៃ ហ៊ុនឡេង ជំនាញដែលកំពុងមានតម្រូវការទីផ្សារការងារខ្លាំងគឺ ជំនាញព័ត៌មានវិទ្យាទាក់ទងនឹងបច្ចេកវិទ្យាថ្មីៗ ជំនាញវិស្វកម្ម ជំនាញអេឡិចត្រូវនិច និងជំនាញស្ថាបត្យកម្មជាដើម។
ឯកឧត្តមបន្តថា៖ «យើងឃើញហើយថាការរីកចម្រើនវិស័យសំណង់ ការអភិវឌ្ឍហេដ្ឋារចនាសម្ព័ន្ធអីនេះ យើងឃើញថាអត់ទាន់(មានកម្លាំងពលកម្ម)ផ្តល់ជូនឲ្យបានពេញលេញនូវឡើយទេ...ឆ្លុះបញ្ចាំងមកវិញយើងឃើញថាពេលដែលប្រទេសកម្ពុជាកំពុងរីកចម្រើន យើងអត់ទាន់ផ្តល់មនុស្សដែលជាអ្នកបច្ចេកទេសផ្នែកទាំងអស់នោះទៅដល់ទីផ្សារឲ្យបានពេញលេញទេ»។
ក្រៅពីជំនាញទាំងនេះ មន្ត្រីខាងលើបញ្ជាក់ថាអ្នករកការងារធ្វើក៏ត្រូវចេះដែរជំនាញទន់ដូចជាការធ្វើការងារក្រុម ទំនាក់ទំនង ការដោះស្រាយបញ្ហា និងភាសាបរទេស ដែលមិនមែនតែភាសាអង់គ្លេស។ បើមានចំណុចទាំងនេះបន្ថែមទៀត ឯកឧត្តមថាអ្នករកការងារធ្វើមិនត្រឹមតែងាយរកការងារទេ ថែមទាំងអាចរក្សាការងារបានល្អទៀតផង៕
