- 2019-01-01 01:30:00
- សុខភាព
ឆ្នាំថ្មីហើយ សូមថែសុខភាពឲ្យល្អ ដឹងសញ្ញាគ្រោះថ្នាក់ ៣នេះ កុំឲ្យកើតជំងឺស្ទះសរសៃឈាមម្យ៉ាង
- 2019-01-01 01:30:00
- ចំនួនមតិ 0 | ចំនួនចែករំលែក 0
ឆ្នាំថ្មីហើយ សូមថែសុខភាពឲ្យល្អ ដឹងសញ្ញាគ្រោះថ្នាក់ ៣នេះ កុំឲ្យកើតជំងឺស្ទះសរសៃឈាមម្យ៉ាង
ចន្លោះមិនឃើញ
ប្រជាជនកម្ពុជាបច្ចុប្បន្នកំពុងប្រឈមនឹងការកើត និងកើនឡើងនូវជំងឺលើសឈាម ទឹកនោមផ្អែម និងជំងឺមិនឆ្លងផ្សេងទៀត ដូចជាជំងឺមហារីក ជំងឺវិបត្តិផ្លូវដង្ហើមរ៉ាំរ៉ៃ។ ក្នុងចំណោមជំងឺនានាទាំងអស់ ជំងឺមិនឆ្លងទាំងនេះ ជាកត្តាធ្វើអោយស្លាប់ និងពិការភាពច្រើនជាងគេ ជាពិសេសក្នុងប្រទេសក្រីក្រ និងប្រទេសកំពុងអភិវឌ្ឍ។
ក្នុងនោះដែរ ជំងឺស្ទះសរសៃឈាមបេះដូង ជាមូលហេតុចម្បងនៃការស្លាប់។ យោងតាមឯកសារ WHO ២០១១ ក្នុងចំណោមប្រជាជនខ្មែរ ១សែននាក់ ចំនួនអ្នកស្លាប់ដោយសារស្ទះសរសៃឈាមបេះដូងមានចំនួន១២៨។ នេះបើតាមព័ត៌មាន ដែលបានចុះផ្សាយក្នុងទំព័រហ្វេសប៊ុក មន្ទីរពេទ្យកាល់ម៉ែត។
ទំព័រដដែលបានបន្តថា អ្នកជំងឺចាំបាច់ត្រូវតាមដាន និងការរករោគវិនិច្ឆ័យនៃជំងឺស្ទះសរសៃឈាមបេះដូងនៅដំណាក់កាលដំបូងៗ មុននឹងគ្រោះថ្នាក់កើតឡើងតាមគ្រប់វិធីសាស្ត្រដែលមាន ជាពិសេសដោយមានជំនួយពីគ្រូពេទ្យឯកទេសបេះដូង។
បច្ចុប្បន្ន ជាមួយនឹងសមត្ថភាពជំនាញវិភាគរូបភាពវេជ្ជសាស្ត្រសរសៃឈាមបេះដូង តាមរយៈម៉ាស៊ីនស្កេនបច្ចេកវិទ្យាចុងក្រោយ Multislice CT Scan ពិតជាមានសារប្រយោជន៍ខ្លាំងណាស់ ចំពោះអ្នកដែលមានរោគសញ្ញា ៣ដូចខាងក្រោម។
១. ឈឺចុក ឬណែនដើមទ្រូង
២. ថប់ដង្ហើម
៣. អារម្មណ៍ ឫសញ្ញាហត់ភ្លាមៗ ដោយគ្មានមូលហេតុ។
ចំណែកឯក្រុមមនុស្ស ដែលប្រឈមគ្រោះថ្នាក់សរសៃឈាមបេះដូងខ្ពស់ អាចធ្វើការកត់សម្គាល់ទម្លាប់ ៧យ៉ាង។ ១. អ្នកដែលមានអាយុច្រើន
២. អ្នកដែលលើសទម្ងន់
៣. អ្នកពិសាបារី
៤. អ្នកដែលមានជំងឺលើសឈាម
៥. អ្នកដែលមានជំងឺទឹកនោមផ្អែម
៦. អ្នកដែលលើសជាតិខ្លាញ់
៧. អ្នកដែលមិនធ្វើលំហាត់ប្រាណ ឫប្រកបរបរនៅនឹង មួយកន្លែងយូរម៉ោងពិសេសការងារការិយាល័យ។
សូមបញ្ជាក់ថា ប្រសិនបើលោកអ្នកមានរោគសញ្ញា និងកត្តាគ្រោះថ្នាក់ដូចបានរៀបរាប់ខាងលើនេះ សូមមកពិគ្រោះជាមួយគ្រូពេទ្យឯកទេសជំងឺបេះដូង ដើម្បីស្វែងរកវិធីសាស្ត្រការពារ និងព្យាបាលទាន់ពេលវេលា សំដៅកាត់បន្ថយការស្លាប់ និងពិការភាពដែលបណ្ដាលមកពីជំងឺស្ទះសរសៃឈាមបេះដូង ដែលជាឃាតកស្ងប់ស្ងាត់បំផុត (silent killer)។
