- 2018-10-16 03:25:31
- ការអប់រំ
កូនខ្មែរចាំគ្មានថ្ងៃភ្លេច! ជនបរទេស២រូប លះបង់យ៉ាងធំធេងដើម្បីជួយខ្មែរ រហូតដល់អស់ជីវិត
- 2018-10-16 03:25:31
- ចំនួនមតិ 0 | ចំនួនចែករំលែក 0
កូនខ្មែរចាំគ្មានថ្ងៃភ្លេច! ជនបរទេស២រូប លះបង់យ៉ាងធំធេងដើម្បីជួយខ្មែរ រហូតដល់អស់ជីវិត
ចន្លោះមិនឃើញ
ការលះបង់ទ្រព្យសម្បត្តិ លុយកាក់ មាសប្រាក់ ពេលវេលា កម្លាំងកាយ និងកម្លាំងចិត្តពីសំណាក់ជនជាតិដទៃ មកកាន់ប្រជាជនកម្ពុជាគឺជារឿងគួរឱ្យស្ងប់ស្ងែងបំផុត រកអ្វីប្រៀបផ្ទឹមមិនបាន។ ថ្ងៃនេះ Sabay សូមបង្ហាញមុខជនបរទេស២ ក្នុងចំណោយជនបរទេសដែលមានចិត្តសម្បុរសផ្សេងទៀត រូបធ្លាប់លះបង់យ៉ាងធំធេងមកកាន់កម្ពុជា ដោយចេញពីក្ដីស្រឡាញ់ និងមនោសញ្ចេតនាដ៏ជ្រាលជ្រៅមិនអាចកាត់ថ្លៃបាន រហូតដល់លោកអស់ជីវិត។
១. លោកវេជ្ជបណ្ឌិត Beat Richner ស្ថាបនិកមន្ទីរពេទ្យគន្ធបុប្ផា
បន្ទាប់ពីទទួលបានបរិញ្ញាបត្រវេជ្ជសាស្ត្រ ក្នុងឆ្នាំ១៩៧៣ លោកវេជ្ជបណ្ឌិត Beat Richner ធ្វើជាអ្នកឯកទេសថែរទាំកុមារ នៅឯមន្ទីរពេទ្យកុមារនៅហ៉្សូរ៉ិច ប្រទេសស្វ៊ីស។ បន្ទាប់មក លោក រិចន័របានធ្វើការអោយកាកបាទក្រហមស្វីស និងត្រូវបានបញ្ជូនមកប្រទេសកម្ពុជាជាទីដែលលោកបានធ្វើការនៅមន្ទីរពេទ្យ គន្ធបុប្ផាទីក្រុងភ្នំពេញចន្លោះឆ្នាំ១៩៧៤ និងឆ្នាំ១៩៧៥។
គួរឲ្យសោកស្ដាយ ក្នុងឆ្នាំ១៩៧៥ ខ្មែរក្រហមបានកាន់កាប់ប្រទេសកម្ពុជា លោកត្រូវបានបង្ខំឲ្យចាកចេញទៅប្រទេសស្វីសវិញហើយក៏បានបន្តការងាររបស់លោកនៅទីក្រុងហ៉្សូរ៉ិច។
ក្នុងឆ្នាំ ១៩៩២ លោកវេជ្ជបណ្ឌិតបានត្រឡប់មកកម្ពុជានិងបានឃើញការបំផ្លិចបំផ្លាញយ៉ាងធ្ងន់ធ្ងរក្នុងសម័យកម្ពុជាប្រជាធិបតេយ្យ។ដោយសារហេតុផលចង់ឃើញមន្ទីរពេទ្យនេះដំណើរការឡើងវិញលោកក៏បើកនិងសាងសង់មន្ទីរពេទ្យគន្ធបុប្ផាឡើងវិញនៅពេលនោះ។
មន្ទីរពេទ្យមានសាខាចំនួន៤ នៅរាជធានីភ្នំពេញ ដែលបានបង្កើតឡើងដោយ លោកវេជ្ជបណ្ឌិត បេអាត រិចន័រ។ ក្នុងនោះរួមមាន៖
គន្ធបុប្ផាទី១ កសាងនៅឆ្នាំ១៩៩២
គន្ធបុប្ផាទី២ កសាងនៅឆ្នាំ១៩៩៦
គន្ធបុប្ផាទី៣ កសាងនៅឆ្នាំ២០០៥
គន្ធបុប្ផាទី៤ កសាងនៅឆ្នាំ២០០៧
ចំណែកនៅខេត្តសៀមរាប លោកវេជ្ជបណ្ឌិត Beat Richner បានកសាងមន្ទីរពេទ្យ ជយវរ្ម័ន ទី៧ ក្នុងឆ្នាំ១៩៩៩។
លោកវេជ្ជបណ្ឌិត Beat Richner បានទទួលមរណភាពក្នុងជន្មាយុជន្មាយុ៧១ឆ្នាំ នៅប្រទេសស្វីស ដែលជាប្រទេសកំណើតរបស់លោក បន្ទាប់ពីលោកវេជ្ជបណ្ឌិតបានធ្លាក់ខ្លួនឈឺអស់រយៈពេលជាច្រើនខែមកហើយ។ ការបាត់បង់បិតាសង្គ្រោះជីវិតកុមារកម្ពុជា បានធ្វើឲ្យពលរដ្ឋខ្មែរទូទាំងប្រទេសសោកសង្រេង និងស្រណោះជាពន់ពេក នូវការលះបង់ដ៏ធំធេងរបស់លោកវេជ្ជបណ្ឌិតមកលើកូនខ្មែរ។
ទោះបីជាលោកវេជ្ជបណ្ឌិត បានឃ្លាតឆ្ងាយលែងវិលត្រឡប់ តែកូនខ្មែរគ្រប់រូបនៅតែចងចាំមិនភ្លេច ចំពោះការលះបង់ទាំងកម្លាំងកាយ ទាំងថវិកា និងតែងរិះរកគ្រប់វិធី ដើម្បីប្រមូលមូលនិធិមន្ទីរពេទ្យមួយនេះឲ្យដំណើរការរហូតមកដល់សព្វថ្ងៃ។
ក្នុងរយៈពេលប្រមាណជាង២៥ឆ្នាំមកនេះ មន្ទីរពេទ្យគន្ធបុប្ផា បានចំណាយថវិកាអស់ ៦៣២លានដុល្លារ ក្នុងការផ្ដល់សេវាព្យាបាលជំងឺដល់កុមារ និងស្ត្រីមានផ្ទៃពោះនៅទូទាំងប្រទេសកម្ពុជាដោយឥតគិតថ្លៃ។ ថវិកាទាំងនោះបានមកពីរដ្ឋាភិបាលស្វីស ពីសប្បុរសជនទាំងក្នុងនិងក្រៅប្រទេស ព្រមទាំងមួយចំណែកទៀតមកពីរដ្ឋាភិបាលកម្ពុជា។ បុរសចិត្តធម៌រូបនេះ ក៏តែងលេងឧបករណ៍សេឡូ ជាមធ្យោបាយក្នុងការស្វែងរកថវិកាជួយទ្រទ្រង់ដល់មន្ទីរពេទ្យគន្ធបុប្ផា ។
២. លោក Christian ស្ថាបនិកអង្គការ PSE (POUR UN SOURIRSD'ENFANT)
ក្នុងឆ្នាំ ១៩៩៥ Christian និង Marie-France des Pallières បានមកបំពេញបេសកកម្មមនុស្សធម៌នៅប្រទេសកម្ពុជា ក្រោយពេលដែលអ្នកទាំងពីរបានចូលនិវត្តន៍នៅប្រទេសបារាំង។ ប៉ុន្តែមួយថ្ងៃមុនពេលអ្នកទាំងពីរចេញទៅមានក្មេងប្រុសតូចគួរឱ្យអាណិតម្នាក់នៅតាមដងផ្លូវបានបង្ហាញប្រាប់ពីកន្លែងដែលគាត់រស់នៅ។នេះជាអ្វីដែលអ្នកទាំងពីរបានឃើញកន្លែងចាក់សំរាមដ៏សំខាន់នៅជាយក្រុងរាជធានីភ្នំពេញ ហើយក៏ឃើញកុមារកម្ពុជាច្រើនកំពុងរស់នៅគួរឲ្យអាសូរ។
លោកChristian និងភរិយា Marieមានការតក់ស្លុតយ៉ាងខ្លាំងចំពោះអ្វីដែលបានឃើញហើយក៏ផុសគំនិតមួយគិតថា «អ្នកមិនអាចមើលឃើញរឿងបែបនេះហើយបន្តរស់នៅយ៉ាងមានក្ដីសុខ បែបនេះបានទៀតទេ»។
ក្រោយមកពីរនាក់ប្ដីប្រពន្ធខាងលើក៏បានលះបង់រឿងគ្រប់យ៉ាងទាំងអស់ ដែលនៅពីក្រោយខ្នង ហើយចាប់ផ្ដើមជីវិតថ្មីមួយនៅរាជធានីភ្នំពេញ ក្នុងក្ដីសង្ឃឹមមួយថានឹងមិនឲ្យស្ថានភាពបែបនេះកើតឡើងចំពោះកុមារកម្ពុជាទៀតទេ។ បន្ទាប់មកអ្នកទាំងពីរបានយកប្រាក់កាសសល់ពីការសន្សំទិញអាហារឆ្ងាញ់ៗ និងចាប់ផ្ដើមផ្ដល់ជំនួយជាលើកដំបូងដល់កុមារនៅកន្លែងចាក់សំរាម។ ក្នុងឆ្នាំ១៩៩៦ លោក Christian និងភរិយា ចាប់ផ្ដើមជួលអគារមួយ និងផ្ដល់កន្លែងស្នាក់នៅដល់កុមារតូចៗចំនួន 60 នាក់។ រហូតមកដល់បច្ចុប្បន្ននេះមានសិស្សជាង ៧០០០នាក់ មានអាយុពី៦ ដល់ ២០ឆ្នាំត្រូវបានចុះឈ្មោះចូលរៀននៅក្នុងសាលា PSE ។ នេះបើតាមគេហទំព័រផ្លូវការរបស់សាលាមួយនេះ។
PSE គឺកើតឡើងចេញពីបេះដូង និងមនោសញ្ចេតនា មិនអាចកាត់ថ្លៃបានរបស់ប្ដីប្រពន្ធជនជាតិបារាំងមួយគូនេះ។ អ្នកទាំងពីរបានរៀបការរយៈពេលជាង ៥០ឆ្នាំមកហើយ និងមានកូនពេញវ័យចំនួនបួននាក់។ ប៉ុន្តែគួរឱ្យសោកស្ដាយលោកកChristian បានស្លាប់បាត់បង់ជីវិតទៅហើយដោយជរាពាធ។
សាលាPSE គឺជាអនុស្សាវរីយ៍២០ឆ្នាំចុងក្រោយរបស់អ្នកទាំងពីរ ជំនួសឱ្យការចូលនិវត្តន៍ដ៏សុខសាន្តនៅបារាំង៕