- 2019-05-12 07:30:00
- ការអប់រំ
វីរបុរសសង្គ្រោះ២នាក់ម្ដាយនិងកូនស្រីតូចពីរញ្ជួយដីនៅឥណ្ឌូណេស៊ីបានស្លាប់៣សប្តាហ៍បន្ទាប់
- 2019-05-12 07:30:00
- ចំនួនមតិ 0 | ចំនួនចែករំលែក 0
វីរបុរសសង្គ្រោះ២នាក់ម្ដាយនិងកូនស្រីតូចពីរញ្ជួយដីនៅឥណ្ឌូណេស៊ីបានស្លាប់៣សប្តាហ៍បន្ទាប់
ចន្លោះមិនឃើញ
គាត់គឺជាវីរបុរសម្នាក់ដែលបានជួយសង្គ្រោះជនរងគ្រោះ២នាក់ដោយការរញ្ជួយដីគឺម្តាយ និង កូនស្រីតូចនៅក្នុងប្រទេសឥណ្ឌូណេស៊ីកាលពីខែកញ្ញាឆ្នាំមុន ប៉ុន្តែរឿងរ៉ាវរបស់គាត់នៅតែត្រូវបានគេយកមកនិយាយ។
អ្នកស្រី Iriani នឹងមិនបានជួបអ្នកសង្គ្រោះរបស់គាត់ម្តងទៀតទេ។ លោក Ng Kok Choong អាយុ ៥៣ឆ្នាំ ជនជាតិសិង្ហបុរី បានស្លាប់ក្នុងរយៈពេលតែ ៣សប្តាហ៍ប៉ុណ្ណោះ បន្ទាប់ពីការរញ្ជួយដី ៧,៤ រិចទ័រ និង រលកយក្សស៊ូណាមិមួយដែលបានវាយប្រហារកោះស៊ូឡាវេស៊ី។
នៅពេលគាត់ត្រូវបានគេប្រាប់ដំណឹងពីមរណភាពលោកង៉ (Ng) អ្នកស្រីមានអារម្មណ៍ "សោកសៅយ៉ាងខ្លាំង"។ "ពួកយើងឥតមានជាប់សាច់ឈាមនឹងគ្នាទេ ប៉ុន្តែគាត់សុខចិត្តលះបង់ខ្លួនឯងសម្រាប់អ្នកដទៃ"។ អ្នកស្រីបាននិយាយ។
វាជាការប្រកួតប្រជែងហក់ឆត្រយោងហើយវាជាចំណង់ចំណូលចិត្តរបស់គាត់ ទើបធ្វើឲ្យលោកបានទៅដល់កោះរបស់ទីក្រុង Palu ប្រទេសឥណ្ឌូណេស៊ីជាកន្លែងដែលលោកបានជួយម្ដាយកូន២នាក់ពីការបាក់សង្កត់ដោយអាគារនិងពីការវាយប្រហារដោយរលកយក្សស៊ូណាមិ។
Ng Kok Choong យកខ្លួនទៅប្តូរដើម្បីឲ្យ២នាក់ម្ដាយនិងកូនស្រីតូចបានរស់
ក្នុងនាមជាអតីតកងកុម្ម៉ង់ដូ សម្រាប់ល្បែងហោះហើរលើអាកាសនេះគឺជាអ្វីដែលគាត់ស្រលាញ់បំផុត។ បន្ទាប់ពីកូនប្រុសម្នាក់បានរៀបការហើយគាត់បាននិយាយប្រាប់ប្រពន្ធគាត់គឺអ្នកស្រី Sharon វ័យ៥៣ឆ្នាំ ថាដល់ពេលដែលគាត់ត្រូវសម្រាកខ្លះហើយ។
លោកង៉ ជាបុគ្គលិកចូលនិវត្តន៍ និង បន្ទាប់ពីបានអាជ្ញាប័ណ្ណលោតឆត្រយោង លោកក៏បានចូលរួមប្រកួតកម្មវិធីហក់ឆត្រយោងជាច្រើនប្រទេស។ វាជាថ្ងៃទី២៨ ខែកញ្ញាឆ្នាំមុន គឺនៅថ្ងៃកើតហេតុ ពេលដែលលោកនឹងមិត្តភ័ក្ដិលោតឆត្រយោងជាមួយគ្នាឈ្មោះ Francois de Neuville នៅពេលដែលអ្នកទាំង២ស្ថិតនៅក្នុងព្រឹត្តិការណ៍រញ្ជួយដី។
ពួកគេរៀបនឹងចាកចេញពីសណ្ឋាគារ Mercure ហើយបានឃើញសណ្ឋាគារទាំងមូលបានដួលរលំ។
នៅខាងក្នុងសណ្ឋាគារគឺអ្នកស្រី Iriani ។ "ខ្ញុំនៅលើកម្រាលជាមួយ (កូនស្រីរបស់ខ្ញុំ) Zahrah។ ភ្លាមៗ អ្វីៗទាំងអស់នៅពីមុខយើងបានធ្លាក់ចុះ។ ទូរទស្សន៍បានបុកមុខរបស់ខ្ញុំ"។ អ្នកស្រីរៀបរាប់។
នៅក្នុងព្រឹត្តិការណ៍បាក់សង្កត់នោះ ពួកគេទាំង២នាក់ឃើញកូនស្រីតូច ហើយព្យាយាមយកនាងចេញពីកម្ទេចកំទីដែលបាក់ ប៉ុន្តែម្ដាយរបស់នាងតូចនៅជាប់ក្នុងគំនរអាគារ។ លោកង៉ បានឲ្យមិត្តភ័ក្ដិរបស់លោកយកក្មេងស្រីទៅកន្លែងសុវត្ថិភាព ហើយគាត់ព្យាយាមជួយម្តាយម្នាក់ទៀត។
បន្ទាប់មករលកយក្សស៊ូណាមិក៏បានមកដល់ ហើយលោក de Neuville ដែលនៅលើដើមឈើជាមួយក្មេងស្រី ភិតភ័យយ៉ាងខ្លាំង។ "រលកយក្សក៏បានបោកចូលសណ្ឋាគារ...ហើយខ្ញុំគិតថាគាត់ប្រហែលមិនអាចធ្វើវាបានទេ។ គ្មានកន្លែងគេចខ្លួនឡើយ"។
ក្រោយមក de Neuville បុរសជនជាតិបែលហ្សិកបានទៅដល់ជុំរុំសុវត្ថិភាព លោកមានការភ្ញាក់ផ្អើលយ៉ាងខ្លាំងនៅពេលដែលឃើញលោកង៉នៅទីនោះ។ ពួកគេទាំង២អោបគ្នា។
អ្នកស្រី Iriani បាននិយាយថាគាត់បានស្រែកប្រហែល២ម៉ោងឲ្យគេជួយ ព្រោះលោកង៉ម្នាក់ឯងមិនអាចលើកផ្ទាំងស៊ីម៉ង់ដែលបាក់សង្កត់គាត់បានឡើយ។ ប៉ុន្តែលោកង៉នៅតែព្យាយាមជួយ។ "គាត់ប្រាប់ខ្ញុំថាកូនស្រីខ្ញុំនៅរស់ ហើយនោះបានផ្ដល់កម្លាំងចិត្តខ្ញុំដើម្បីរស់"។ ប្រហែលជាង២ម៉ោង រហូតដល់មានមនុស្សម្នាក់ទៀតទៅដល់ទើបពួកគេអាចជួយអ្នកស្រីបាន។ អ្នកស្រី Iriani បានរៀបរាប់។
ការហោះហើរចុងក្រោយនៅកន្លែងក្នុងក្តីសុបិន
ប្រពន្ធរបស់គាត់ដែលបានទៅទទួលគាត់នៅប្រលានយន្តហោះ បានរៀបរាប់ថា "នៅពេលខ្ញុំអោបគាត់ គាត់សួរខ្ញុំថា Darling តើនោះជាខ្ញុំឬ ហើយផែនដីម៉េចនៅតែញ័រ?"។
ទោះជាយ៉ាងណា ប្រហែល២សប្ដាហ៍បន្ទាប់ពីគាត់ត្រលប់មកផ្ទះវិញ គ្មានអ្វីអាចបញ្ឈប់គាត់ពីការធ្វើដំណើរទៅកាន់ទីក្រុង Bir នៅរដ្ឋ Himachal Pradesh ប្រទេសឥណ្ឌាតាមការគ្រោងទុក ជាកន្លែងដែលគាត់ចុះឈ្មោះប្រកួតពានហក់ឆត្រយោងពិភពលោក (Paragliding World Cup)។
ទេសភាពជួរភ្នំហិមាល័យគឺជាកន្លែងក្នុងក្តីសុបិនរបស់គាត់ ហើយក៏ជាកន្លែងផ្ដាច់ជីវិតគាត់ក្នុងឧប្បត្តិហេតុធ្លាក់ឆត្រយោង។ ក្រុមរុករកបានប្រទះឃើញគាត់នៅមានជីវិត ប៉ុន្តែពេទ្យមិនអាចជួយសង្គ្រោះគាត់ពីការប៉ះទង្គិចផ្នែកក្បាលធ្ងន់ធ្ងរឡើយ។
ប្រពន្ធរបស់លោកង៉បង្ហូរទឹកភ្នែករៀបរាប់ថាប្តីរបស់គាត់ធ្លាប់បាននិយាយថា "គាត់នឹងស្លាប់ដោយគ្មានការសោកស្ដាយ ព្រោះវាជាអ្វីដែលគាត់សប្បាយចិត្តនឹងធ្វើ"៕
អាន៖ ការ share លើ Facebook ដែលបំផ្លាញជីវិតគ្រួសារទាំងស្រុងរបស់អតីតបុគ្គលិកធនាគារម្នាក់
អាន៖ សុខចិត្តបើកឡានកំពុងឆេះគេចពីហ្វូងមនុស្សផ្ទុះស្លាប់ម្នាក់ឯង ត្រូវគេទុកជាវីរបុរស