- 2019-05-29 23:30:00
- ការអប់រំ
ទម្លាប់មិនល្អ ៤ បុគ្គលិកមិនអាចរីកចម្រើន និងប្រឈមអស់ការងារថែមទៀត
- 2019-05-29 23:30:00
- ចំនួនមតិ 0 | ចំនួនចែករំលែក 0
ទម្លាប់មិនល្អ ៤ បុគ្គលិកមិនអាចរីកចម្រើន និងប្រឈមអស់ការងារថែមទៀត
ចន្លោះមិនឃើញ
ចង់ក្លាយជាបុគ្គលជោគជ័យមិនមែនជារឿងលំបាក ហើយក៏មិនមែនជារឿងងាយស្រួលនោះដែរ។ ដូច្នេះដើម្បីធ្វើឲ្យខ្លួនឯងមានការរីកចម្រើនទៅមុខលុះត្រា មនុស្សគ្រប់គ្នាហ៊ានទទួលស្គាល់នូវការពិត នៃទម្លាប់មិនល្អរបស់ខ្លួន ហើយជម្រះនូវទម្លាប់មិនល្អទាំងនោះចោល ចាប់យកទម្លាប់ល្អវិញ នោះនឹងធ្វើឲ្យយើងរីកចម្រើនទៅមុខមិនខាន។ ដូច្នេះ Sabay សូមណែនាំទម្លាប់មិនល្អ ៤ ដែលនាំឲ្យយើងមិនរីកចម្រើន ហើយផ្ទុយទៅវិញប្រឈមនឹងការបណ្ដេញចេញពីការងារ បើមិនព្រមផ្លាស់ប្ដូរទម្លាប់អាក្រក់នេះទេ។
តោះ! ប្រិយមិត្តប្រសិនបើមិនចង់អស់ការងារទេ សូមធ្វើការផ្លាស់ប្ដូរភ្លាម ដោយមិនត្រូវដើរតាមទម្លាប់មិនល្អខាងក្រោមនេះ៖
១. ការប្រើប្រាស់ពេលវេលាមិនត្រឹមត្រូវ៖
មកធ្វើការយឺតម៉ោង៖ ការគោរពពេលវេលាគឺជាកត្តាសំខាន់ ប្រសិនបើយូរៗម្ដងយើងមកធ្វើការយឺតនោះមិនអីទេ ប៉ុន្តែស្ទើរជារៀងរាល់ថ្ងៃរមែងមកធ្វើការយឺត ដោយយកលេសដដែលៗ ដូចជា ស្ទះចរាចរណ៍, ជាប់កិច្ចការផ្ទះ, មើលកូន, សុខភាពមិនល្អ ដែលហេតុផលដដែលៗនេះ នឹងធ្វើឲ្យពិន្ទុការងាររបស់យើងធ្លាក់ចុះ ព្រោះទម្លាប់មិនល្អ ដែលដឹងថាចំណុចទាំងអស់នេះនាំឲ្យយឺតមិនខិតខំប្រឹងប្រែងងើបឲ្យបានពីព្រឹកឬចេញដំណើរមកធ្វើការឲ្យបានមុនស្ទះចរាចរណ៍ជាដើម។
ឆ្លៀតធ្វើអ្វីៗខុសពីការងារ៖ ទទួលស្គាល់ថា គ្មាននរណាម្នាក់ផ្ចង់អារម្មណ៍ធ្វើការរហូតពេញ៨ម៉ោងនោះទេ រមែងរកវិធីសម្រាកកាយ ចិត្ត ដើម្បីឲ្យស្ថានភាពផ្លូវចិត្តប្រសើរ ប៉ុន្ដែក៏មិនគួរយកលេសនេះធ្វើខុសរឿងខ្លាំងដូចជា យកពេលវេលាប្រើប្រាស់ហ្វេសបុកផ្ទាល់ខ្លួនច្រើនពេក ស្ដាប់ចម្រៀង មើលរឿងតាម YouTube ឬការឆាតឆ្លងឆ្លើយតាមសារអេឡិចត្រូនិកច្រើនហួសហេតុដែលភាគច្រើនជារឿងផ្ទាល់ខ្លួនមិនមែនកន្លែងការងារ។
ស្អែកចាំបង្ហើយ៖ ជាទូទៅមនុស្សរមែងល្វើយនៅចុងម៉ោងនៅពេលគៀកចេញពីធ្វើការងារដើម្បីទៅផ្ទះ ដូច្នេះពួកគេរីករាយនឹងបានសម្រាក។ ប៉ុន្តែបើទោះជាបែបនេះក្ដី ប្រសិនបើការងារចាំបាច់ យើងគួរតែបង្ហើយវាឲ្យរួចបើទោះចុងម៉ោងក៏ដោយ កុំទុកវានៅស្អែក នៅពេលទម្លាប់ស្អែកចាំបង្ហើយ អាចនឹងធ្វើឲ្យធ្លាប់ខ្លួន ឬកិច្ចការមួយចំនួនរមែងមិនទាន់តាមកាលកំណត់របស់ថ្នាក់លើ ឬកៀកបានធ្វើ ធ្វើឲ្យការងារមិនសូវបានល្អ។
២. ការរអ៊ូរទាំ៖ ការងារមានស្រាលមានធ្ងន់ ហើយគ្រប់មនុស្សរមែងបញ្ហាផ្ទាល់ខ្លួនផងដែរ។ ទោះយ៉ាងណាយើងក៏មិនត្រូវរអ៊ូរទាំរឿងផ្ទាល់ខ្លួនច្រើនពេក ឬត្អូញត្អែរអំពីភាពហត់នឿយច្រើនហួសហេតុទៅកាន់មនុស្សគ្រប់គ្នានៅកន្លែងធ្វើការ ដែលធ្វើឲ្យមនុស្សមួយចំនួនមិនពេញចិត្តនឹងយើង ឬធ្វើឲ្យកម្សោយនៃការងារ។ ប្រសិនបើការងារនោះធ្ងន់ពិបាករែកពន់ យើងអាចប្រកាសរកជំនួយពីក្រុមការងារ ឬពីប្រធានផ្នែក ហើយប្រសិនបើមានបញ្ហាគ្រួសារខ្លាំងអាចសុំច្បាប់សំរាក ដើម្បីកាត់ទម្លាប់មិនល្អ ដែលរអ៊ូរទាំច្រើននៅកន្លែងធ្វើការ។
៣. ទម្លាប់មិនហ៊ានទទួលការងារធំ៖ មនុស្សមួយចំនួនមិនហ៊ានផ្លាស់ប្ដូរអ្វីដែលថ្មី ចូលចិត្តធ្វើអ្វីធម្មតាៗ និងធ្លាប់ធ្វើ ដូច្នេះពួកគេនឹងមានទម្លាប់មួយនៅពេលមេដាក់ការងារឲ្យរមែងប្រកែកញ៉ាញថា "ខ្ញុំធ្វើមិនកើត" ។ ដូច្នេះដើម្បីផ្លាស់ប្ដូរទម្លាប់មិនល្អនេះចេញ ដោយងាកមកបង្កើតនូវជំនឿលើខ្លួនឯង ដោយជំនួសមកវិញនូវពាក្យថា "ខ្ញុំអាចធ្វើបាន" ហើយផ្ដោតលើគោលដៅ របស់ខ្លួន និងរៀបចំគម្រោងរួចជាស្រេចដើម្បីសម្រេចវា។ ដូច្នេះអ្នកគួរបង្កើតរូបភាពជោគជ័យសម្រាប់ជីវិតខ្លួនឯង ហើយជឿថាអ្នកអាចសម្រេចបាននូវរឿងគ្រប់យ៉ាងមកវិញ។
៤. ទម្លាប់ធ្វើការមិនដាក់វិន័យសម្រាប់ខ្លួនឯង៖ គ្មានបុគ្គលជោគជ័យណាមួយដែលមិនបានបង្កើតវិន័យខ្លួនឯងនោះទេ វិន័យគឺជាកត្តាសំខាន់នាំឲ្យយើងសម្រេចបាននូវគោលដៅរបស់ខ្លួន។ ដូច្នេះត្រូវចាប់ផ្ដើមធ្វើការដាក់វិន័យខ្លួនឯង ហើយព្យាយាមធ្វើកិច្ចការទៅតាមផែនការរបស់ខ្លួនដែលបានដាក់ចេញតាមកាលវិភាគប្រចាំថ្ងៃ ប្រចាំសប្ដាហ៍ ប្រចាំខែ និងឆ្នាំជាដើម។
