- 2019-06-25 08:41:53
- ការអប់រំ
អ្នកជំនួញប្រមាណជា ២០០នាក់ ជួបជុំគ្នាបង្កើតកម្មវិធី យោគៈ និង សមាធិដើម្បីបង្កើនគុណភាពជីវិត
- 2019-06-25 08:41:53
- ចំនួនមតិ 0 | ចំនួនចែករំលែក 0
អ្នកជំនួញប្រមាណជា ២០០នាក់ ជួបជុំគ្នាបង្កើតកម្មវិធី យោគៈ និង សមាធិដើម្បីបង្កើនគុណភាពជីវិត
ចន្លោះមិនឃើញ
ដើម្បីចូលរួមប្រារព្វទិវាយោគៈអន្តរជាតិឆ្នាំ ២០១៩នេះ សភាយុវពាណិជ្ជករអន្តរជាតិកម្ពុជាសាខាទួលគោក JCI Cambodia-Toul Kork បានផ្តួចផ្តើមបង្កើតគម្រោងទីមួយ ដែលមានឈោ្មះថា «យោគៈ និង សមាធិដើម្បីបង្កើនគុណភាពជីវិត» ដែលមានអ្នកចូលរួមប្រមាណជិត ២០០នាក់ និងដែលបានប្រព្រឹត្តិទៅកាលពីថ្ងៃទី ២៣ មិថុនា ២០១៩ នៅសាលប្រជុំជាន់ទី៣ នៃផ្សារទំនើបអ៊ីអន។
លោកស្រី ពៅ ធនរី ដែលជាសហគ្រិនម្នាក់ និង ជាអនុប្រធានផ្នែកអភិវឌ្ឍន៏បុគ្គល នៃសភាយុវពាណិជ្ជករអន្តរជាតិកម្ពុជាសាខាទួលគោក បានស្ម័គ្រចិត្តធ្វើជាប្រធានអនុវត្តន៏គម្រោង ដែលដឹកនាំ ក្រុមការងារស្ម័គ្រចិត្តរបស់គម្រោងនេះឡើង បានលើកឡើងថា បងប្អូនអ្នកចូលរួម ដែលមានវត្តមាននៅក្នុងកម្មវិធីថ្ងៃនេះ សុទ្ធសឹងជាសហគ្រិន អ្នកជំនួញ និងអ្នកធ្វើការតាមស្ថាប័ននានា ដែលមានភាពមមាញឹកជាខ្លាំងក្នុងជីវិតរស់នៅប្រចាំថ្ងៃ។ ដូច្នេះគោលបំណងសំខាន់ក្នុងថ្ងៃនេះ គឺចង់ឲ្យបងប្អូនចំណាយពេលវេលាមួយព្រឹក ផ្តល់កាដូឲ្យខ្លួនឯង មិនមែនជាទ្រព្យសម្បត្តិ តែជាការផ្តល់ពេលវេលាដ៏ពេញលេញមួយឲ្យខ្លួនឯង សង្រួមចិត្តតាមរយៈការធ្វើសមាធិ និងយោហ្គា ដែលលំហាត់ចិត្ត និងកាយនេះមានសារៈប្រយោជន៍យ៉ាងច្រើនចំពោះសុខភាពផ្លូវកាយ និងផ្លូវចិត្ត។
លោកស្រី បានបន្ដទៀតថា យោហ្កាជួយផ្តល់ឲ្យបងប្អូននូវសុខភាពផ្លូវដង្ហើមល្អ រាងកាយមាំមួនពីក្នុង ដល់ក្រៅ។ សមាធិ ជួយឲ្យបងប្អូនមានសុខភាពផ្លូវចិត្តល្អ រឹងមាំ និងវិជ្ជមាន ដែលទាំងអស់នេះ ជាគ្រឹះដ៏សំខាន់ជួយបង្កើននូវគុណភាពជីវិត ជំរុញប្រសិទ្ធភាពការងារ ក៏ដូចជាបង្កើតនូវការប្រាស្រ័យទាក់ទងល្អរវាងក្រុមគ្រួសារ មិត្តភក្តិ និងដៃគូជំនួញរបស់បងប្អូនផងដែរ។
ថ្លៃងនាឱកាសនោះដែរ លោកស្រី ទុន លក្ខិណា ស្ថាបនិកសភាយុវពាណិជ្ជករអន្តរជាតិកម្ពុជាសាខាទួលគោក បានថ្លែងថា ថ្ងៃនេះលោកស្រីពិតជាមានសេចក្តីរីករាយ ដែលបានឃើញវត្តមាន ព្រះតេជគុណ លោក លោកស្រី និង បងប្អូនទាំងអស់គ្នា ផ្តល់កិត្តិយស ចូលរួមកម្មវិធីនេះ ដែលបានរៀបចំឡើង ដោយការផ្តួចផ្តើម ពីសំណាក់ សមាជិកសមាជិការ ក៏ដូចជាលោកស្រីផ្ទាល់ ជាពិសេស ក្រោមការរៀបចំយ៉ាងយកចិត្តទុកដាក់ អំពីលោកស្រី ពៅ ធនរី ដែលជាប្រធានគម្រោង និង ក្រុមការងារសម្របសម្រួល គឺលោកស្រី សេង សុភ័ណ្ឌ និងលោក ជ័យ សំអន ។
JCI កម្ពុជា សាខាទួលគោក ទើបតែចាប់ផ្តើមបង្កើតឡើងក្នុងឆ្នាំ 2019 ដែលបច្ចុប្បន្នមានសមាជិកសរុប ៤៨ នាក់ ដែលពួកគាត់ មកពីមជ្ឈដ្ឋានផ្សេងៗគ្នា តែអ្វីដែលយើងមានរួមគ្នា គឺយើងចង់ឲ្យគ្រួសារ មិត្តភក្រ និងសង្គមជាតិយើង មានការរីកចម្រើន ក្រៅពីនេះ គឺយើងចង់ចែករំលែក អ្វីដែលយើងអាចធ្វើបានជាការតបស្នង ទៅជូនសង្គមជាតិយើងវិញ។ ដូចដែលលោកស្រីប្រធានគម្រោងយើងបានរៀបរាប់យ៉ាងលំអិត នាងខ្ញុំសង្ឃឹមថា គម្រោងនេះនឹងផ្តល់អត្ថប្រយោជន៍ជូនដល់បងប្អូន ទោះបីជាទទួលបានតិច ឬច្រើនក៏ដោយ សូមឲ្យសន្តិភាពផ្លូវចិត្តរបស់បងប្អូនស្ថិតនៅជាប់រហូត ដែលយើងអាចនិយាយបានថា Peace is Possible។
ជាចុងបព្ចាប់ ព្រះករុណានាងខ្ញុំសូមឆ្លៀតក្នុងឪកាសនេះថ្លែងអំណរព្រះគុណជូនចំពោះ ព្រះអង្គគ្រូ គូសុភាព វាគ្មិនលោក នឹម ឈុន្នី និង លោក យាន់ វណ្ណៈ និងថ្លែងអំណរគុណដល់ក្រុមហ៊ុន Phnom Penh Precast Plants ក្រុមហ៊ុនធានារ៉ាប់រ៉ងអាយុជីវិត AIA ក៏ដូចជាក្រុមហ៊ុនផ្សេងៗទៀត ដែលបានចូលរួមឧបត្ថម្ភ និង សហការ បង្កើតតគម្រោងនេះឡើង ហើយក៏សូមអរគុណដល់យុវជនក្រុមការងារស្ម័គ្រចិត្តទាំងអស់ ដែលបានសហការយ៉ាងល្អ និងលោកស្រីប្រធានគម្រោង ដែលបានផ្តួចផ្តើមគម្រោង ដ៏មានអត្ថប្រយោជន៏មួយនេះ អ្វីដែលមិនអាចភ្លេចបានគឺ នាងខ្ញុំសូមអរគុណដល់បងប្អូនទាំងអស់ដែលបានមកចូលរួមនិងគាំទ្រគម្រោងមូយនេះ ដោយសង្ឃឹម ថាបងប្អូននិងចូលរួមនូវគំរោងផ្សេងៗទៀត របស់ JCI កម្ពុជាសាខាទួលគោក ក៏ដូចជា គម្រោងរបស់ JCI Cambodia សាខាផ្សេងៗទៀតដូចគ្នា៕