- 2019-01-15 06:57:21
- ការអប់រំ
ល្អមែន! ស្ទែម បំផុសបំផុលស្ត្រីកម្ពុជាឱ្យ ចេះភាពជាអ្នកដឹកនាំ សម្រាប់បំណិនជីវិត
- 2019-01-15 06:57:21
- ចំនួនមតិ 0 | ចំនួនចែករំលែក 0
ល្អមែន! ស្ទែម បំផុសបំផុលស្ត្រីកម្ពុជាឱ្យ ចេះភាពជាអ្នកដឹកនាំ សម្រាប់បំណិនជីវិត
ចន្លោះមិនឃើញ
អង្គការពិព័រណ៍វិទ្យាសាស្ត្រកម្ពុជា ជាអង្គការក្រៅរដ្ឋាភិបាលក្នុងស្រុកមួយ មានបំណងបំផុសយុវតីកម្ពុជាឱ្យពិចារណាអាជីពការងារនៅក្នុងវិស័យវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា ដូចដែលបានផ្ដល់ជូនតាមរយៈសិក្ខាសាលាជាលើកទី១ស្ដីពីភាពជាអ្នកដឹកនាំ ក្រោមគម្រោងស្ទែមដើម្បីស្ត្រីកម្ពុជា កាលពីសប្ដាហ៍កន្លងទៅនេះស្រាប់។
ក្រោមការឧបត្ថម្ភរបស់ស្ថានទូតអង់គ្លេសប្រចាំកម្ពុជា យើងខ្ញុំបានដាក់ឱ្យអនុវត្តគម្រោងក្លឹបស្ទែមចំនួន៨សប្ដាហ៍ដែលដឹកនាំដោយប្អូនៗយុវតីនៅតាមវិទ្យាល័យសិក្សានានារបស់ពួកគាត់ផ្ទាល់។ ក្លឹបស្ទែមផ្ដល់ឱកាសដល់យុវតីក្នុងការអភិវឌ្ឍជំនាញភាពជាអ្នកដឹកនាំនិងបង្កើតបណ្ដាញជាមួយយុវតីឯទៀតដែលមានគំនិតដូចគ្នា តាមរយៈសកម្មភាពដ៏រីករាយផ្សេងៗទាក់ទងនឹងស្ទែម។
ឯកសារសម្រាប់ប្រើក្នុងក្លឹបស្ទែមគឺអាចទាញយកបានដោយឥតគិតថ្លៃសម្រាប់វិទ្យាល័យនានានៅកម្ពុជា ហើយស័ក្តិសមប្រើសម្រាប់សិស្សថ្នាក់ទី៨ ដល់ទី១០។ ប្រសិនបើមានចំណាប់អារម្មណ៍បង្កើតក្លឹបស្ទែមដោយខ្លួនឯង ប្អូនៗយុវតីអាចចុះឈ្មោះបានតាមរយៈតំណនេះ ដើម្បីទាញយកឯកសារដឹកនាំក្លឹបប្រចាំសប្ដាហ៍។
ប្រធានបទប្រចាំសប្ដាហ៍នីមួយៗផ្ដោតសំខាន់ទៅលើអាជីពផ្សេងៗនៅក្នុងវិស័យស្ទែម ហើយសមាជិកក្លឹបនឹងទទួលបានការបំផុសគំនិតតាមរយៈវីដេអូកិច្ចសម្ភាសន៍ជាមួយស្ត្រីដែលជាអ្នកជំនាញអាជីពនៅក្នុងផ្នែកផ្សេងៗនៃស្ទែម។ ពួកគាត់នឹងសិក្សាតាមរយៈសកម្មភាពសិក្សាចំទិសដៅនិងគួរឱ្យចាប់អារម្មណ៍។
ការដឹកនាំក្លឹបជាការងារងាយៗ ហើយយុវជននិងយុវតីអាចចូលរួមធ្វើជាសមាជិកក្លឹបបាន។ វិធីដឹកនាំក្លឹបគឺត្រូវបានផ្ដល់ជូនជារៀងរាល់សប្ដាហ៍ ហើយធនធានសម្រាប់ប្រើក្នុងក្លឹបគឺសាមញ្ញនិងងាយរក មិនថានៅខេត្តឬទីក្រុងឡើយ។ វិធីដឹកនាំក្លឹបអាចទាញយកបានចាប់ពីថ្ងៃផ្សាយដំណឹងនេះតទៅ។
សូមចុចត្រង់នេះដើម្បីទទួលបានព័ត៌មានបន្ថែមនិងការចុះឈ្មោះ។ គម្រោងនេះត្រូវបានឧបត្ថម្ភដោយ ស្ថានទូតអង់គ្លេសប្រចាំកម្ពុជា ក្នុងបំណងលើកកម្ពស់ស្ត្រីកម្ពុជា។
សម្រាប់ព័ត៌មានបន្ថែម សូមទាក់ទងមកកាន់ អង្គការពិព័រណ៍វិទ្យាសាស្ត្រកម្ពុជា តាមរយៈ
អ៊ីមែល ៖ stemsisters@stemcambodia.ngo
ទូរសព្ទលេខ ៖ 023 72 72 62
ទំព័រវេប ៖ http://www.stemcambodia.ngo/stem-sisters-cambodia/
ឬទំព័រហ្វេសប៊ុក https://www.facebook.com/CambodiaSTEMSisters/